*தமிழின் சிறப்புமிகு தனித்துவம்*

பொதுவாக நம் மக்களிடையே ஆங்கிலத்தில் உரையாடுவதும் உறவாடுவதும் ஒரு பெரிய சமூக அந்தஸ்தாக பார்க்கப் படுகிறது. 

அது கூட பரவாயில்லை. தமிழ் தெரிந்தோர் மத்தியிலே கூட தமிழில் பொது வெளியில் உறவாடுவது அல்லது உரையாடுவது என்பது சமூகத்தில் ஏளனமாகவும் அந்தஸ்து குறைவாகவும் பார்க்கப்படுவது தான் மிகப் பெரிய கொடுமை. 

நம் மகாகவி பாரதி தமிழ்ச் சங்கத்தின் கொள்கைகளாக நாம் வரையறுத்து இருப்பது: 

*தமிழில் உறவாடுவோம் உரையாடுவோம்*

*எம்மொழியும் நேசிப்போம் - நம் மொழியை சுவாசிப்போம்*

செம்மொழியாம் எம்மொழி எம் மொழிக்கும் தாழ்ந்ததில்லை. பிற மொழிகளும் பெருமைக்குரியனவே. ஆயினும் ஒரு சிந்தனை எனக்குள் வந்தது. 

ஆங்கில மோகம் அதிகம் உள்ள நம் தமிழ்ச் சமூகத்தில் தமிழின் தனித்துவமான சிறப்புகளை பகிர வேண்டியது கட்டாயம் எனத் தோன்றியது. 

எடுத்துக்காட்டாக, 

ஆங்கிலத்தில், *Speaker* is one who speaks. அவ்வளவே. அதாவது ஒரு செயலை செய்கிறார் என்ற பொருள் மட்டுமே.

ஆனால் தமிழில் அவர் *பேச்சாளர்* என அறியப் படுகிறார். அதாவது *பேச்சினை ஆள்பவர்* என்ற பொருளில் அழைக்கப் படுகிறார். அதாவது அந்த செயலையே ஆள்கிறார் என்கின்ற பொருளில் தமிழ் மொழி அவர்களை பெருமைப் படுத்துகிறது.

அதேபோல, 

*Writer : எழுத்தாளர்*

என்ற சொல்லாடலும் வருகிறது. 

மனித சமூக பரிணாம வளர்ச்சிக்கு அடித்தளமாக இருந்தவை எழுத்துகளும் சொற்களும் மட்டுமே. அந்த இரண்டையும் ஆள்பவர்களால் தான் ஒரு சமூகத்தை நல்ல சமூகமாக கட்டமைக்க முடியும். 

தமிழ்ச் சமூகம் அப்படித்தான் கட்டமைக்கப் பட்டிருக்கிறது.

பெருமை கொள்வோம்! 

தமிழின் பெருமையை பறைசாற்றுவோம்!! 

குறிப்பு: இதுபோல வேறு சொல்லாடல்கள் இருந்தால் பின்னூட்டம் இடுங்களேன். 

*ஆட்சியாளர்* என்ற சொல் போல நீங்களும் கூறலாமே!

- ஸ்ரீவி