••••••••••••••••••••••••••••••••
*{33} சிலம்பொடு ஒரு பயணம்*
*இந்திர விழவு ஊர் எடுத்த காதை*
*திருவிழாக் காட்சிகள்*
••••••••••••••••••••••••••••••••
இந்திர விழா துவங்கியதும், திருவிழாக் காட்சிகள் கண் கவரும் வண்ணம் இருந்தன. எல்லாக் கோயில்களிலும் சிறப்பு ஆராதனை பிரம்மதேவன் நெறிமுறைப்படி நிகழ்த்தப் பட்டது. பலவகையான தெய்வங்களின்கோயிலும் பொலிவுற்று விளங்கின. அங்கு வேள்விகள் நடந்தன.
*நால் வகைத் தேவரும், மூ-அறு கணங்களும்,*
*பால் வகை தெரிந்த பகுதித் தோற்றத்து*
அங்கு பலவிதமான தெய்வங்களுக்கு பூசை நடந்தது.
*அறவோர் பள்ளியும், அறன் ஓம்படையும்,*
அருகர் புத்தர் வாழும் தவச்சாலைகளும் அறம் செய்யும் தர்மச்சாலைகளும்
*திறவோர் உரைக்கும் செயல் சிறந்து ஒருபால்-*
பேச்சாற்றல் மிக்க பெரியோர் நிகழ்த்தும் சொற் பொழிவுகளால் சிறந்து விளங்கின.
*கொடித் தேர் வேந்தனொடு கூடா மன்னர்*
*அடித் தளை நீக்க அருள் சிறந்து ஒருபால்-*
வேந்தனோடு போரிட்டு சிறைப்படுத்திக் கொண்டுவரப்பட்ட சிறைக் கைதிகளின் காலில் பூட்டிய விலங்குகள் கழற்றப்படும் அருள் புரிந்த நற்செயல் ஒரு பக்கம் நடந்தபடி இருந்தது.
மன்னன் பிறந்தநாள் முன்னிட்டு நடக்கக்கூடிய பல்வேறு விழாக்களில் சிறைச்சாலைக் கைதிகளை விடுவிக்கும் ஒரு பழக்கம் இருந்ததை சிலப்பதிகாரம் நமக்குச் சுட்டுகிறது.
------------------
இனி மோகன் ஐயா
------------------
இன்று நான் விவரிக்கக இருப்பது, இசை நிகழ்ச்சிகளின் சிறப்பும், தென்றல் வருடிய புகார் தெருக்களில், நடந்த களியாட்டங்களும்.
.
இசை நிகழ்ச்சிகளின் சிறப்பு:
பல விதமான இசை நிகழ்ச்சிகள் தெருக்களில் நடைபெற்றன.
என்ன என்ன நிகழ்ச்சிகள்?
கண்ணுளாளர்-
கண்கவர்ஆடும்
கூத்தர்கள் கருவிக்குயிலுவர்-
குயிலுவர் என்றால் வாத்தியம் வாசிப்பவர், இங்கு தோலினினால் ஆன வாத்தியம் வாசிப்பவர்
யாழிலே பண் இசைத்துப்பாடும் புலவர்கள்
வாய்ப்பாட்டுப் பாணர்கள்
என "எண்அருஞ் சிறப்பின் இசை ஒரு பால்" நடந்த வண்ணம் இருந்தன.
முழவுகள் இரவு பகல் பாராது முழங்கின. சிறிய தெருக்களும், பெரும் வீதிகளும் மகிழ்ச்சி ஆரவாரங்களோடு காணப் பெற்றன- " முடுக்கரும் வீதியும் விழவுக்களி சிறந்த வியலுள்அங்கண்" என்பது அடிகளின் வரிகள்.
மாருதம் காண இருப்பது மருகு:
அடுத்து காண இருப்பது " மாருதம் தரும் மருகு".
அது என்னய்யா?
தென்றல்( மாருதம்) தவழ்ந்த புகார் வீதிகள்தாம்; அவற்றில்
நிகழ்ந்த களியாட்டங்கள்தாம்.
எடுத்த எடுப்பிலேயே மாதவி பற்றி ஒரு வர்ணணையைப் பதிவு செய்கிறார் இளங்கோ அடிகள்-"காதல் கொழநனைப் பிரிந்து அலர் எய்தா மாதர்க் கொடுங்குழை மாதவி" யாம். அலர் என்பது இரு காதலர்களின் காதல் என்பது ஊரறிந்த ஒன்று . அம்பல் என்றால் சில பேருக்கு மட்டும் தெரியும். காதல்கொழநனனான கோவலனைப் பிரிந்து அலர் தூற்றலால் துன்புறாமல் (கணிகையர் குலத்தில் பிறந்தும்) அவனைப்பிரியாமலிருந்தாள் , மகரக்குழைகளை அணிந்த மாதவி. மறை பொருளாக , கணவனைப்பிரிந்து" அலர் எய்தினாளா" கண்ணகி என நினைக்கத்தோன்றுகிறது.
கோவலன் என்ன செய்கிறான்?
இல்லத்தில் வளரும்( இயற்கை முறையில்!) முல்லை, மல்லிகை மற்றும் இருவாட்சி , தாழியில் வளரும் குவளை, வண்டினம் சூழும் செங்கழு நீர் மலர்கள் என கட்டப்பட மாலைகளை மாதவியோடு அணிந்து காமத்தின் களிப்பை அடைந்தான்.
நறுமணம் கமழும் பூம் பொழிலில் விளையாட விரும்பி
நாள்முழுவதும் மகிழ்ச்சி பொங்கும் நாளங்காடியில் பற்பல மலர்களின் நறுமணமும், அகிற்புகை, சந்தனச்சாந்து இவற்றின் நறுமணமும்சேர்ந்து கொள்ள , இவற்றை நுகர்ந்து கொண்டே, பரத்தையோராடும் பாணர்களோடும் கோவலன் களித்துத் திரிந்தான்.
இவனைப்போல வண்டுகளும்இளி என்ற சுரத்தை (ஐந்தாவது சுரமான பஞ்சமம்) பாடியவாறு பூக்களை நாடித் திரிந்தன . இளவேனில் காலம், மலையிலிருந்து வருடி வருடி வீசும் தென்றல் வேறு என மக்களும் இயற்கையும் பின்னிப் பிணைந்த இந்திர விழவு!
மலை மாருதம் என மலைத்தென்றலைக்குறித்தார். இது மலையமாருதம் என்ற இராகத்தைப்போல் இதயத்தை வருடிக்கொடுத்துத் தொடும்.
இந்தக்கொண்டாட்டங்களில் என்னைக் கவர்ந்தது புகார் நகர தெருக்கள்தாம். குறுந்தெருக்கள், அகன்ற வீதிகள், நாற்சந்திகள், இராஜ பாட்டைகள் யாவும் மக்கள் இசைக்கருவிகளோடு சேர்ந்து கூடி ஆடிப் பாடி மகிழ ஏதுவாக அமைந்தன. குண்டு, குழி , மேடு, பள்ளம் எல்லாம் நம்காலத்தவை போலும்!
*பயணம் தொடரும்*
No comments:
Post a Comment