★★★★★★★★★★★★★★★
சங்க இலக்கியம்
அகநானூறு
குடவோலை முறை
முதல் வாக்கு எந்திரம்
★★★★★★★★★★★★★★★
உலகெங்கும் பெரிய பெரிய
ஜனநாயக வல்லரசுகளில்
நடைபெறும் தேர்தலின் முன்னோடி
நம் பாரம்பரிய மிக்கத் தமிழகமே
நிர்வாகப் பதவிகளுக்கு
தேர்தலின் மூலம் மக்களின்
பிரதிநிதியை மக்களே
தேர்ந்தெடுக்கும் தேர்தல்முறை
தொன்மையான தமிழகத்தின்
சமூகவியல் நடைமுறையாம்.
ஆச்சரியங் கொள்ள வேண்டாம்.
குடவோலை முறை என்பதே அதுவாம்.
தாம் விரும்பும் நபர் பெயரை
பனையோலை ஒன்றில் பொறித்து
பொதுவிடத்தில் வைக்கப்பட்ட
மண்குழிசி (பானை) ஒன்றிலே
ஒவ்வொருவராய் போட்டபின்
அவற்றை எடுத்து எண்ணிப்பார்த்து
அதிக வாக்குப் பெற்றவரை
தேர்ந்தெடுக்கும் முறையே குடவோலை முறையாகும்.
அகநானூறு தொகுப்பினிலே
எழுபத்து ஏழாம் பாடல் இதுபற்றி
பதிவேற்றி வைத்துள்ளது.
அப்பாடலை பார்த்திடலாம் நாமும்:
(அகநானூறு 77 -
மருதன் இளநாகனார்)
"நன்னுதல் பசப்பவும் ஆள்வினை தரீஇயர்
துன்னருங் கானந் துன்னுதல் நன்றெனப்
பின்னின்று சூழ்ந்தனை யாயினன் றின்னாச்
சூழ்ந்திசின் வாழிய நெஞ்சே வெய்துற
இடியுமிள் வானம் நீங்கி யாங்கனும்
குடிதிப் பெயர்ந்த சுட்டுடை முதுபாழக்
கயிறுபிணிக் *குழிசி ஓலை* கொண்மார்
பொறிகண் டழிக்கும் ஆவண மாக்களின்
உயிர்திறம் பெயர
நல்லமர்க் கடந்த
தறுக ணாளர் குடர்த்தரீஇத் தெறுவரச்
செஞ்செவி எருவை யஞ்சுவர இகுக்குங்
கல்லதர்க் கவலை போகின் கீறூர்ப்
புல்லரை யித்திப் புகழ்படு நீழ
எல்வளி யலைக்கும் இருள்கூர் மாலை
வானவன் மறவன் வணங்குவிற் றடக்கை
ஆனா நறவின் வண்மகிழ்ப் பிட்டன்
பொருந்தா மன்னர் அருஞ்சமத் துயர்த்த
திருந்திலை யெஃகம் போல அருந்துயர்
தருமிவள் பனிபார் கண்ணே"
பொருள்:
(தலைவி வருந்தி அரற்றும்படி, ஊழ்வினையின் காரணமாக
பொருளீட்ட, மிக்க துன்பம் தரும் காட்டுப் பாதையில் செல்லும்படி மனம் செலுத்துகிறது.
இடியும் மழையும் வானம் வழங்காததால் வறண்டு போன நிலத்திலுள்ள மக்களெல்லாம் வேறு இடங்களுக்குச் சென்றுவிட்டனர்.
அங்கு கயிற்றால் கட்டப் பெற்றிருக்கும் பானையில் தகுதியான தலைவனை தேர்ந்தெடுக்கும் பொருட்டு ஒவ்வொன்றாக எடுக்கப்படும் ஓலையினைப் போன்று
சிவந்த செவியுடைய பருந்துகள் இறந்து போன வீரர்களின் சடலங்களிலிருந்து குடல்களைப் பிடுங்கித் தின்னும்.
அத்தகைய பாதையில் அமையப் பெற்ற இத்தி மர நிழல் புள்ளிகளாகக் காணப்படும்.அங்கு வீசும் காற்று கூட மிக்க வெம்மையாக காணப்படும்.
வானவனின்(சேரன்) படைத்
தலைவனும் வணங்குவதற்குரிய வலிமையான வில்லுடையவன் பிட்டன்.
அவனது இலை போன்ற கூர் முனையுடைய வேல்கள் பகைவரின் உடல்களை வருத்தும். அதைப்போன்று இவளது கண்ணீர் பொருந்திய விழிகள் என்னை வருத்துகின்றன.)
அந்த காலத்தில் வழக்கத்திலிருந்த தேர்தல் முறையான குழிசி ஓலை (குடவோலை) முறை
பணந் திண்ணும் கழுகின் செவிகளின் தோற்றத்திற்கு உவமையாக கூறப்பட்டுள்ளது.
இதன் மூலம் இரண்டாயிரம் ஆண்டுகளுக்கு முன்பே
ஜனநாயக முறையில் தேர்தல் நடைபெற்றுள்ளதை உணரலாம்.
உலக வரலாற்றில்
ஜனநாயகத் தேர்தல் முறையினில்
முதன்முதல் பயன்பட்ட பொருள்
மண்குடம் (குழிசி/பானை) மற்றும்
பனையோலை தான்.
இதுவே 'குடவோலை' என்றானது.
இலக்கியங்களில் உவமை என்ற ஒன்று மட்டும் இல்லாது போயிருக்குமானால் பல தகவல்களை நாம் இழந்திருக்க நேரிட்டிருக்கும்.
வேட்பாளருக்கான தகுதிகள் மற்றும் தேர்தல் நடத்தும் முறை பற்றி கூறும் உத்திர மேரூர் குடவோலை கல்வெட்டுகள் பற்றி வருகின்ற பதிவொன்றில் தவறாது நாம் பார்த்திடலாம்.
~ தமிழ்ப் பயணம் தொடரும்
*உங்கள்_தோழன்_ஸ்ரீவி*
(குறிப்பு இது மூன்று ஆண்டுகளுக்கு முன் நான் தொடர்ந்து எழுதி வந்த *சங்க கால இலக்கியம் ஒரு புதையல்* எனும் என் படைப்பில் நான் பகிர்ந்த ஒன்று)
No comments:
Post a Comment