பயணங்கள் முடிவதில்லை…(14)

 பாகம் 14

பயணங்கள் முடிவதில்லை…

*அமெரிக்கப் பாலைவன இரவின் மடியில் தொடங்கிய ஒரு மறக்க முடியாத பயணம்…*

Phoenix விமான நிலையத்தில் காலடி வைத்த நொடியிலேயே, இந்தப் பயணம் ஒரு அற்புதமான அனுபவமாக மாறப் போகிறது என்பதை உள்ளுணர்வு சொல்லியது. நேரத்தை வீணாக்காமல், முன்பே பதிவு செய்திருந்த rental car-ஐ எடுக்கச் சென்றோம்.

அது ஒரு சாதாரண parking lot அல்ல…

ஒரு பெரிய உலகம்!

சுமார் 300 கார்கள் அமைதியாக வரிசையில் நின்று கொண்டிருந்த அந்த இடம், *இடப் பற்றாக்குறை* என்ற வார்த்தையே தெரியாத அமெரிக்காவின் பிரம்மாண்டத்தை உணர்த்தியது. எங்களுக்கு கிடைத்தது வெறும் 3000 மைல்கள் மட்டுமே ஓடிய, பளபளப்பான புதிய Santa Fe. அது பொறுமையுடன் எங்களுக்காகக் காத்திருந்த ஒரு உண்மையான பயணத் தோழன்.

Phoenix நகரின் விளக்குகள் பின்னால் மெதுவாக மறையத் தொடங்கின. I-17 வடக்கு நோக்கிச் செல்லும் அந்த அகலமான நெடுஞ்சாலை,

சுற்றிலும் அடர்ந்த இருள்.

நேராக நீண்டு செல்லும் சாலை.

வழியில் வாகனங்கள் மிகவும் குறைவு. *( இல்லை என்றே கூறலாம்)*

*ஒரு கட்டத்தில் மொபைல் சிக்னல் கூட முழுமையாக மறைந்துவிட்டது.*

ஆனால் அந்த அமைதி எங்களுக்கு எந்தக் குறைபாடாகவும் தோன்றவில்லை.

மாறாக, *அந்த தூய அமைதியே இந்தப் பயணத்தின் மிகப் பெரிய வரமாக இருந்தது.*

I-17 வழியாக முன்னேறியபோது, சாலை மெதுவாக ஏறத் தொடங்கியது. Black Canyon City-ஐத் தாண்டியதும், நிலப்பரப்பு உயர்ந்து கொண்டே சென்றது. காரின் ஹெட்லைட்களின் ஒளி மட்டுமே இருளில் வழிகாட்டியாக இருந்தது. 65–70 மைல் வேகத்தில், முழு விழிப்புணர்வுடனும் கட்டுப்பாட்டுடனும் பயணித்தோம்.

சுமார் இரண்டு மணி நேர பயணத்திற்குப் பிறகு, Flagstaff அருகே வந்தபோது…

அரிசோனாவின் மற்றொரு முகம் எங்களுக்காகக் காத்திருந்தது.

மரங்கள் நிறைந்த பசுமை.

குளிர்ந்த, உறைக்கும் காற்று.

சில இடங்களில் வெள்ளைப் பனித் தடங்கள் காணப்பட்டன.

*இது அதே Arizona தானா?* என்று ஒரு ஆச்சரியக் கேள்வி எழுந்தது.

அப்போது தான் Texas to Houston பயணத்தின் நினைவு மனதில் எழுந்தது. அங்கு ஒவ்வொரு 100-120 கிலோமீட்டர் இடைவெளியிலும் rest room வசதிகள் அழகாக இருந்தன. ஆனால் இங்கு *Flagstaff-இன் உயரமான, குளிரான பகுதியில் அப்படிப்பட்ட எளிதான வசதிகள் கண்ணில் படவில்லை.* அந்த வித்தியாசம் மனதில் ஒரு சிறிய ஒப்பீட்டை ஏற்படுத்தியது *அதே அமெரிக்கா தான், ஆனால் ஒவ்வொரு பகுதியும் தனித்துவமான சவால்களுடன் இருக்கிறது என்பதை உணர்த்தியது.*

பாலைவனத்தின் நடுவே ஒரு குளிர்ந்த மலைநாடு!

காரை விட்டு இறங்க முயன்றபோது, இரத்தத்தை உறையவைக்கும் குளிர் உடலைத் தாக்கியது. உயர்ந்த வெள்ளைப் பனி மலைகள் சுற்றிலும் நின்று கொண்டிருந்தன. அந்தக் குளிரின் தீவிரம் காரணமாக வெளியே நீண்ட நேரம் நிற்க முடியவில்லை.

Flagstaff-ஐத் தாண்டி, US-89 வழியாக Page நோக்கி திரும்பினோம். இரவு

சுற்றிலும் சிவப்பு பாறைகள் இருளில் அவை நிழல்களாகவே தெரிந்தாலும், அவற்றின் பிரம்மாண்டமும் அழகும் கற்பனையில் முழுமையாக உருவெடுத்தது.

இரவு 1 மணிக்கு மேல் Page நகரத்தை அடைந்தோம்.

Lake Powell அருகே சென்றபோது, *இருளுக்குள் கூட அந்த பிரம்மாண்டமான நீர்நிலையின் இருப்பை உணர முடிந்தது.*

சிறிய நகர விளக்குகள் எங்களுக்கு ஒரு அமைதியான, இதமான வரவேற்பு கொடுத்தன.

5 மணி நேரத்திற்கும் மேலான இரவுப் பயணம்…

ஆனால் *சோர்வைவிட மனநிறைவும், உள்ளார்ந்த மகிழ்ச்சியும் பல மடங்கு அதிகம்.*

Airbnb எங்களை அன்புடன் வரவேற்றது.

மறுநாள் காலை…

*இயற்கையின் அதிசயங்களுடன் நேருக்கு நேர் சந்திப்பு!*

காலை வெளிச்சத்தில் அந்தப் பயணம் இன்னும் பிரம்மாண்டமாகவும், வண்ணமயமாகவும் மாறியது. உலகப் புகழ்பெற்ற Horseshoe Bend எங்களை அழகாக எதிர்கொண்டது.

மேலிருந்து கீழே பார்த்த அந்தக் காட்சி…

*ஒரு உயிருள்ள இயற்கை ஓவியம்!*

குதிரை நகம் போல அழகாக வளைந்து ஓடும் Colorado River.

சுமார் 1000 அடி ஆழம்.

கோடான கோடி ஆண்டுகளாக இயற்கை வடிவமைத்த அற்புதமான கலைப்பொக்கிஷம்.

அங்கே நின்ற அந்த நொடியில், நேரம் நின்றுவிட்டது போல உணர்ந்தோம்.

*இந்தப் பயணம் வெறுமனே ஒரு இடத்தைப் பார்ப்பதற்கானது அல்ல.*

அமைதியை உணர்வதற்கு…

இயற்கையின் பிரம்மாண்டத்தைப் புரிந்து கொள்வதற்கு…

மனிதன் எவ்வளவு சிறியவன் என்பதைத் தாழ்மையுடன் ஏற்றுக்கொள்வதற்கு…

*இரவுப் பயணம் தனித்துவமான அழகைக் கொடுத்தது.*

*ஆனால் பகல் பயணம் அதன் முழு நிறங்களையும், உயிரையும் வெளிப்படுத்தியது.*

சில நேரங்களில், நாம் செல்லும் இடம் மட்டுமல்ல…

அங்கு செல்லும் பாதையே நம்முடைய வாழ்க்கையை மாற்றி அமைக்கும் சக்தி கொண்டது.

*Horseshoe Bend ஒரு சாதாரண சுற்றுலா இடம் அல்ல.*

*அது காலம், இயற்கை, அமைதி இந்த மூன்றின் புனிதமான சங்கமம்.*

ஒரு முறை பார்த்தால் போதும்.

அது வெறும் நினைவில் மட்டும் தங்குவதில்லை…

எப்போதும் நம்முடன் வாழும்.

ஒவ்வொரு மலையும், ஒவ்வொரு பாறையும் தன்னுடைய கதையைச் சொன்னது.

சூரியன் அவற்றின் மீது விழும்போது, அந்த *சிவப்பு நிறம் தீ போலப் பளபளத்து,* மனதைப் பறிகொடுக்கச் செய்தது.

இங்கிருந்து US-89 வழியாக 8–10 கி.மீ. சுமார் 10–15 நிமிட டிரைவ் தொலைவில் உள்ளது Glen Canyon Dam.

இது Colorado River மீது கட்டப்பட்ட மிகப் பெரிய அணை.

இதன் மூலமாக உருவானது தான் பிரபலமான Lake Powell.

சுமார் 710 அடி உயரம் (216 மீட்டர்).

மேலிருந்து பார்க்கும் காட்சி மனதை அதிர வைக்கிறது.

ஒரு பக்கம் அழகான நீல நிறத்தில் பரந்து கிடக்கும் Lake Powell.

மறுபக்கம் ஆழமான canyon-க்குள் வேகமாகப் பாயும் Colorado River.

*ஒரே இடத்தில் இரண்டு வெவ்வேறு உலகங்கள்!*

சிறிய நடைபயணம், முழு அணையும் அற்புதமாகத் தெரிகிறது. *(இன்று வரை நான் நம் கல்லணை ஐ பார்த்ததில்லை 🤩)*

US-89 பாலத்தின் மேலிருந்து அணையை முழுமையாக ரசிக்க முடிகிறது. புகைப்படங்கள் எடுப்பதற்கு ஒரு சிறந்த இடம்.

Visitor Center-ல் (சில நேரங்களில் திறந்திருக்கும்) அணையின் வரலாறு, கட்டுமான சுவாரஸ்யங்கள் பற்றிய தகவல்கள் கிடைக்கிறது)

அங்குள்ள அருங்காட்சியகத்தில் நாங்கள் நின்ற ஒரு சிறிய மூலையில், ஒரு சாதாரண விளக்கப் பலகைக்கு அருகில் இருந்த interactive exhibit எங்களை மிகவும் உலுக்கியது.

*Lake Powell மற்றும் Colorado River-இன் நீர் பயன்பாட்டை எளிமையான, விளையாட்டு போன்ற மாடல் மூலம் விளக்கியிருந்தார்கள்.* நகரங்கள், விவசாயம், தொழில்கள் அனைத்தும் இந்த நீரின் மீது எவ்வளவு சார்ந்திருக்கின்றன என்பதை அழகாகக் காட்டியது.

“Low”, “Average”, “High” நீர்வரத்து ஆண்டுகளை slider மூலம் அனுபவபூர்வமாக உணர முடிந்தது. குழந்தைகள் கூட ஆர்வமாக விளையாடும் வகையில் அமைக்கப்பட்டிருந்ததால் அதன் பின்னால் இருந்த செய்தி அவர்களிடமும்

*ஒவ்வொரு துளி நீரும் மதிப்புமிக்கது.அதைப் பாதுகாப்பது நம் ஒவ்வொருவரின் பொறுப்பு* என்ற செய்தியை எடுத்துச்செல்கிறது.

பயணத்திற்கான முக்கிய குறிப்புகள்:

•  வெப்பம் மிக அதிகம். எனவே காலை அல்லது மாலை நேரம் சிறந்தது.

•  காற்று சில சமயங்களில் மிகவும் வேகமாக வீசுகிறது. கவனமாக நிற்க வேண்டும்.

•  பாதுகாப்பு வேலிகள் சில இடங்களில் குறைவாகவே உள்ளன. குழந்தைகளுடன் செல்பவர்கள் மிகுந்த எச்சரிக்கையுடன் இருக்க வேண்டும்.

•  இரவுப் பயணத்தில் Flagstaff போன்ற உயரமான, குளிரான பகுதிகளில் rest room வசதிகள் Texas to Houston பயணத்தைப் போல ஒவ்வொரு 100-120 கி.மீ. இடைவெளியில் எளிதாகக் கிடைக்காது. எனவே முன்கூட்டியே திட்டமிட்டு, தேவையான இடங்களில் நிறுத்தி ஓய்வு எடுக்கவும். குளிர் அதிகமாக இருக்கும் என்பதால், சூடான உடைகள் அவசியம்.

இந்தப் பயணம் எங்களுக்கு கொடுத்தது வெறும் நினைவுகள் அல்ல…

*இயற்கையின் பெருமை, அமைதியின் அழகு, மனிதனின் சிறுமை, நீரின் முக்கியத்துவம் இவை அனைத்தையும் உள்ளத்தில் ஆழமாகப் பதிய வைத்த ஒரு அற்புதமான அனுபவம்.*

ஒரு முறை சென்றால் போதும்…

அந்தப் பாலைவன இரவும், Horseshoe Bend-இன் வளைவும், Glen Canyon Dam-இன் பிரம்மாண்டமும், நம்  உள்ளத்தில் என்றென்றும் நிலைத்து நிற்கும்.