நியூசிலாந்தில் நெடுஞ்சாலைப் பயணம்

 புரட்டிப்போட்ட வாழ்க்கையை

புரட்டி போராடும் நங்கையவளுடன்

இரு வாரங்கள் 

மூன்று தலைமுறை மகளிர் மட்டும் 

நான்கு சக்கரத்தில் 

நான்காயிரம் கிலோமீட்டர்

நியூசிலாந்தில் 

நெடுஞ்சாலைப் பயணம்

ஓவியத்துள் நுழைந்தேனோ...

கனவுக்குள் அமிழ்ந்தேனோ...

இயற்கை எழில் அள்ளிப்பருக

கண்களது போதவில்லை 

மனமதுவோ கொள்ளவில்லை 

மணித்துளிகள் பற்றவில்லை

விட்டு விடு என

இயற்கை பிரித்த நிலமிது

விடுவதில்லை என

குடிபெயர்ந்த மனிதர்கள் 

பசுமை பொங்கும் நிலங்கள்

மறைந்து புகையும் எரிமலைகள்

பற்பல தோற்றத்தில் மலைகள்

பனிமலை அளித்த பனியாறுகள் 

வானம் வசப்படுத்தும் ஏரிகள் 

புள்ளினம் உலவும் வனங்கள் 

சிரித்து கொட்டும் அருவிகள் 

சிலிர்த்து ஓடும் நீரோடைகள் 

சூழ்ந்து மயக்கும் கடல்

நீரோட்டங்களில் மெருகேறிய கற்கள்

நிலமெங்கும்  அழகின் உவகை

வடக்கு தெற்கு தீவை

கடலலைகள் பிரித்தாலும்

வண்டிகள் ஏற்ற கப்பலொன்று போக்குவரத்தை இணைக்கும்

மூடிக் கனலும் எரிமலையது

பிளவு வழி புகையாக 

புவிவெப்பம் கடத்த (geo thermal)

 உருவாகும் மின்சக்தி 

அது மனிதனின் யுக்தி

அடர்ந்த காடுகளுண்டு

அதிசயம் காணீர்

அரவங்கள் (பாம்பு) ஏதுமில்லை

துள்ளி ஓடும் மான்களுண்டு

வேட்டையாடும் விலங்குகள் இல்லை

மனிதனைத் தவிர

டைனோசர் காலத்து பறவைகள் உண்டு

உயிர் பயமில்லை என

பறக்க மறந்த பறவைகள் பல உண்டு

குண்டு குண்டு கொசுக்கள் உண்டு

இரத்த சுவை கேட்காது

தாவர பட்சினி இங்கு அது

அடர்ந்த இருளிலும் 

பயமேதும் இல்லை 

குளிர் காற்றைத் தவிர்த்து

இயற்கையை பிரதிபலிக்கும் 

பளிங்கென நீர்நிலைகள் 

வானமும் சிறை படும் 

தாவரமும் தழைந்திடும் (blue springs)

பனி நீரின் சில்லிப்பில்

கனிமங்கள் கலந்தோட

மயில் கழுத்து நிறமாகும் 

நதிநீரும் நடை பயிலும் (turquoise river)

வானோடு போட்டியிடும்

நீலக்கடல் அலைகள்

சீறிப் பாய்ந்திடும்

கற்பாறைகள் செதுக்கிடும் (pancake rocks)

அலைகள் முத்தமிடும்

மலைகள் இங்குண்டு 

பசுமை போர்த்தும் மலைமீது

பனியும் போர்த்தவே  துடிப்பதுண்டு

காலங்காலமாக பனி போர்த்திய 

மலைகளும் இங்குண்டு (fox glacier)

ஆதியில் பனிமலையிடை

குடிபுகுந்த கடல்நீரின் கதையுண்டு (milford sound)

மலை உயர அருவிகள் 

கடற்காற்றின் விளையாட்டில் 

தொங்கும் அதிசயம் இங்கு

காண்போரின் உள்ளம் மயக்க

டால்பின்கள் ஓடிவரும்

காணும் அதிர்ஷ்டமிருந்தால்...

பென்குயினும் சீலும்

கடலோரம் விளையாடும்

கடலின் மடியில் மலைகள்

மலையின் மடியில் ஏரிகள்

ஏரிகளை அலங்கரிக்கும் மரங்கள் 

பச்சை மஞ்சள் சிவப்பு

போக்குவரத்து சிக்னல் அல்ல

வசந்தத்தின் வண்ணங்கள் 

மரங்களின் ஆடைகள் 

பனி ஆடை உடுத்த

இலை களைந்த மரங்கள் 

காற்றைத் தடுக்க 

வரிசை மாறா மரங்கள் 

நில மடந்தை அணிந்து கொள்ள

பல வண்ண தாவரங்கள் 

பச்சை புல்வெளி 

போர்த்திய நிலத்தில்

ஒய்யாரமாக மேய்ந்திடும்

மாடுகள் வெள்ளாடுகள் மான்கள்

பனி போர்த்திய இளங்காலைகள்

குளிர் ஊடுருவும் அடர் இரவுகள்

கதிரவன் வருகையோ செல்கையோ

வானெங்கும் நிறக் கோவைகள்

கதிரவன் சிரிப்பதுண்டு

 எரிப்பதில்லை

கை எட்டும் தொலைவில் 

வானம் நிறைத்து நட்சத்திரங்கள் 

பால் வெளியும் தெரியும் 

நாம் அதில் சிறுதுளி 

என மனம் உருகும்

உணவுச் சங்கிலி சமன் இல்லை

பெருகும் ...

மானும் மயிலும் முயலும் தீதிங்கே

இயற்கை வழுவில் வழுவாதிருக்க

தேவை சில வியூகங்கள் 

ஓசோன் ஓட்டை விளைவு

இங்கு தெள்ளத் தெளிவு

வானிலையின் நிலைகுலைவு

மனிதனின் தலைகுனிவு

என்றாலும் ..

காலந்தோறும்...

நினைவுப் பெட்டகம் தளும்ப

மென்மையாக அசைபோட

மனதை மயக்கிய 

இனிய பயண நினைவுகள்