••••••••••••••••••••••••••••••••
*{34} சிலம்பொடு ஒரு பயணம்*
*இந்திர விழவு ஊர் எடுத்த காதை*
*புகார் நகர மகளிர்*
••••••••••••••••••••••••••••••••
பொதிகை மலை உச்சியிலே
பிறந்து தவழ்ந்து வந்த தென்றல்
வீதியிலே வலம் வரும் உளமகிழ்
பெண்டிரின் சிரிப்பொலியோடும், பாடித் திரியும் பாணர்களின் பாட்டொலியோடும்
வீதி வலம் வந்ததைக் கூறிய அடிகள்,
புகார் நகரின் பெண்கள் இருந்த நிலையையும் விவரிக்கிறார்.
*கருமுகில் சுமந்து .... இரு கருங் கயலோடு கிடைக்குமிழ் எழுதி*
கரிய மேகம் எனும் கூந்தலைச் சுமந்து,
(பின் நாட்களில் வந்த கவிஞர்கள் கார்மேகக் கூந்தலை பற்றி எழுதாதவர்கள் மிகக் குறைவு என்பதை நினைவில் கொள்க)
இரண்டு கரு மீன்கள் போன்ற கண்களுடன், (*வெள்ளி வயல் மேலே துள்ளும் கயல் போலே இரு விழி தாவக் கண்டேன் என் மேலே* உத்தமபுத்திரன் திரைப்பட பாடல் வரிகள் நெஞ்சிலே நிழலாடுகிறது அல்லவா!) இடையில் குமிழி மலர் போன்ற நாசியினோடு முழுமதி முகத்துடன் விளங்கும் பெண்
*நீர் வாய் திங்கள் நீர் நிலத்து அமுதின்*
வானில் உள்ள அரவங்கள் (ராகு மற்றும் கேது) கவ்விடுமோ என பயந்து நிலத்துக்கு வந்து விட்டாளாம்.
*இரு நில மன்னற்குப் பெருவளம் காட்ட திருமகள் புகுந்தது இச்செழும்பதி ஆம்*
நீண்ட நிலப்பரப்பு உடைய மன்னர்களுக்கும் தனது செல்வ வளம் காட்டுவதற்காக திருமகள் வாழும் செல்வச் சிறப்புடைய நகரம் ஆன புகார் நகரமாம்
*கமலம் தெரிந்தலும் உண்டு கொல்*
திருமகள் வாழும் தாமரையைத் தேடி தாமரைப் போன்ற முகம் கொண்ட நல்லாள் (புகார் நகரம் பெண்ணாக சித்தரிக்கப் பட்டுள்ளது) திரிகின்றாளோ!
*மன்னவன் செங்கோல் மறுத்தல் அஞ்சு பல்லுயிர் பருகும் பகு வாய் குற்றம் ஆண்மையில் திரிந்து... பெண்மையில் திரியும் பெற்றியும் உண்டென*
அரசாளும் மன்னன் செங்கோலுக்கு இழுக்கு ஆகிவிடும் எனக் கருதி பயந்து, பல உயிர்களைக் கொன்று குவிக்க வாய் திறந்தபடி அலையும் கூற்றுவன் தன்னுடைய ஆண் உருவை மாற்றிக் கொண்டாலும், தனது கொல்லும் தொழிலை விட்டொழியாது பெண்ணுருக் கொண்டு இங்கு திரிவதும் உண்டோ! (அழகால் கண்டவரை வாட்டி வதைக்கும் பெண்களை கூற்றுவன் பெண்ணுரு கொண்டு வந்த தோற்றம் என ஒப்பிடுகிறார் கவி -
*நித்தம் நித்தம் பொய்யடா... பேசும் புவியில் மட மாதரை விட்டு உய்யடா உய்யடா உய்*.. எனும் சித்தர் பாடல் நினைவுக்கு வருகிறது அல்லவா)
------------
இனி் மோகன் ஐயா:
------------
மனை சேர்ந்த ஆடவர்:
இந்திர விழா எடுக்கும் சாக்கில் ஆடவர்கள். "மடமாதரோடு "ஆட்டம் போட்டனர்.எப்படிப்பட்ட மாதர்?
*"உருவிலாளன் ஒரு பெருஞ்சேனை"* - மன்மதனின் படை போன்ற இளம்பெண்கள்.
என்ன செய்கிறார்கள்?
*இகல்அமர்ஆட்டி எதிர்நின்று விலக்கி அவர் எழுதுவரி கோலம் முழுமெயும்உறீஇ* -ஆடவர்களை தங்கள் கண்அம்புகளால் எதிர் கொண்டு, இப்படி அப்படி நகர விடாமல் செய்து நெருங்குவதால், இப்பெண்கள் மார்பிலும் தோள்களிலும் சந்தனம், குங்குமம்கொண்டு எழுதிய "தொய்யல்" எனும் சித்திரங்கள் (தற்காலிக ஒப்பனை) அந்த ஆடவர்கள் மேல் படிகிறதாம்.இந்த அடையாளத்தோடு அவரவர் இல்லம் திரும்புகின்றனர்.
வீட்டில்உள்ள மகளிர் "வடமீன்" (அருந்ததி) போல் "கற்பின் மனையுறை"பவர்கள். அவரவர் இணையர் நிலை கண்டு அவர்தம் நீலக்குவளை மலர்கள் போன்ற கண்கள் "புறம்போக" , ( சினம் காரணமாக) சிவந்து காணப்பட்டன. வேறொன்றுமில்லை.. ஊடல்தான்! விருந்தினர் வந்த போதும் நீங்கவில்லை. அவர்களும் இதற்கு இப்பெரிய நிலத்தில் மருந்துண்டோ என நடுநடுங்கி நின்றனர்- *"மருந்தும்தரும்கொல் இம்மாநில வரைப்பு எனக்கையற்று நடுங்கும்"* இவ்வாறு விழா நாட்களில் ஊடல் நிகழ்வுகளும் இருந்தன.
*கருங்கண்ணும்செங்கண்ணும்:*
நறுமண தாதுக்கள் நிறைந்த செங்கழுநீர் மலர்கள் கட்டவிழ்ந்து தேன் சொரிவது போல் கண்ணகியின் கருங்கண்ணும், மாதவியின் செங்கண்ணும் அவரவர் உள்ளக் கிடக்கைகளை, அகத்திலே மறைத்து, கண்ணீர் முத்துகளை உதிர்த்தன. ஊடலால் கண்ணகியின் துயரமும், கூடலால் மாதவியின் மகிழ்ச்சியும் கண்ணீராக வெளிப்பட்டன எனக்கொள்ளலாம்.பெண்களின் கண்கள் வேல்போல் உறுதி கொண்டு ஆடவரைத் தடுத்து ஈர்க்கும். இன்பமோ துன்பமோ வரின் பெண்மையின் தன்மையாக, கண்ணீராக வெளிப்படுத்தும்.
இத்தருணத்தில் கண்ணகிக்கு இடக்கண்ணும் மாதவிக்கு வலக்கண்ணும் துடித்தன. பழங்கால நம்பிக்கைப்படி (ஏன் இப்போதும் கூடத்தான்) பெண்களுக்கு இடக்கண் துடிப்பு நன்நிமித்தத்தையும், இடக்கண் துடிப்பு துர் நிமித்தத்தையும் குறிக்கும் என்பர்.
கண்ணகி விரைவில் கோவலனை அடைவாள்; மாதவி அவனைப் பிரிவாள் என அடிகள் ஒரு நிமித்திகர் போல உணர்த்துகிறார் போலும்.
இந்திர விழாக்கொண்டாட்டங்களைப் பார்த்தோம். அடுத்துக் கடலாடு காதையில் நுழைகிறோம்.
--------
அன்பு வாசகர்களே!
இந்தப் பதிவோடு *இந்திர விழவு ஊர் எடுத்த காதை* நிறைவுறுகிறது.
இனிய வரப்போவது:
*கடலாடு காதை*
.
No comments:
Post a Comment