புத்தாண்டே வருக ! வருக !!
சித்திரை வரட்டும், தமிழ்ப் புத்தாண்டு மலரட்டும்
சிந்தனையின் நேர்மறைச் சிறகுகள் விரியட்டும்
பத்தரை மாற்றுப் பொன் பழையபடி இறங்கட்டும்
பாரதி நம் தமிழ்ச் சங்க உறுப்பினர்கள் ஏறட்டும்
புத்தகம் வாசித்தல் புதுப் பொலிவு பெறட்டும்
போர் அது முடியட்டும், புது வாழ்வு சிறக்கட்டும்
வித்துக்களாய் நிலத்தில் விழுவன முளைக்கட்டும்
விளைநிலம் செழிக்க, *விராலதில் திளைக்கட்டும்
இத் தரை தகிக்க வைக்கும் வெப்ப அலை ஓயட்டும்
இளமையைச் சீரழிக்கும் போதையது தீயட்டும்
பத்து ரூபாய் உணவால் பாழ் பசியும் போகட்டும்
பயிற்று மொழியாகத் தாய்மொழியே ஆகட்டும்
குத்தனூர் குயில்கள் எலாம் குறுந்தொகை கூவட்டும்
கொஞ்சு தமிழ் அதிலேயே பிஞ்சுகள் பேசட்டும்
இத்தனையும் இன்னும் பல நன்மைகள் நிகழட்டும்
ஈடிலாத பாரதமாம்! என அகிலம் புகழட்டும்.
* விரால் -- நன்னீர் மீன்
__. குத்தனூர் சேஷுதாஸ் 14/4/2026
No comments:
Post a Comment