இளமையும் முதுமையும்

 - *இளமையும் முதுமையும்*- 

இளைஞனாய் இருந்தேன்

கவலைப்பட்டேன் பருக்களுக்கு;

முதியவன் ஆனேன் 

கவலைப்படுகிறேன் சுருக்கங்களுக்கு;

இளைஞனாய் இருந்தேன் 

காத்திருந்தேன் அவள் கைப்பிடிக்க;

முதியவன் ஆனேன் காத்திருக்கிறேன்

யாராவது என் கைப்பிடிக்க 

இளைஞனாய் இருந்தேன் ஆசைப்பட்டேன் தனித்திருக்க; முதியவன் ஆனேன்

ஆசை பயமாகியது தனித்திருக்க;

இளைஞனாய் இருந்தேன் 

ஆலோசனைகளை எதிர்த்தேன்;

முதியவன் ஆனேன் 

பேசிட யாரையாவது எதிர்பார்க்கிறேன்;

இளைஞனாய் இருந்தேன்

ஆராதித்தேன் அழகினை;

முதியவன் ஆனேன் 

ரசிக்கிறேன் அழகினை;

இளைஞனாய் இருந்தேன் 

நிரந்தரமென எண்ணினேன்; 

முதியவன் ஆனேன் 

எதிர்பார்க்கிறேன் என்முறையை; 

இளைஞனாய் இருந்தேன் 

ரசித்தேன் நடப்பவைகளை;

முதியவன் ஆனேன் 

ரசிக்கிறேன் நடந்தவைகளை;

இளைஞனாய் இருந்தேன் 

சிரமப்பட்டேன் துயிலெழ;

முதியவன் ஆனேன் 

சிரமப்படுகிறேன் துயில்கொள்ள;

இளமையோ முதுமையோ தேவை, 

வாழ்க்கையை வாழ்ந்து பார்ப்பதும்,

அன்பை பகிர்ந்து பார்ப்பதும்,

அன்புள்ளவர்களுடன் வாழ்ந்து பார்ப்பதுமே!

தியாகராஜன்