தழல்(ழகரக் கவியரங்கம்)

தழல் -  சுல்தானா

என்னைப் பண்ணாய் இசைத்திடும் - தழல் நீ

என்னைப் பனியாய் உருக்கும் - தழல் நீ

என்னை நஞ்சாய் மாய்க்கும் - தழல் நீ

என்னுள் தமிழ் எய்திய - தழல் நீ

அழலோ  தழலோ  கனலோ - யாரோ நீ

 

*******

பஞ்ச பூதங்களில் ஒருவன் - நான்

பஞ்ச பூதங்களின் சேர்க்கையான யாக்கையிலும் - நான்

அழற்கதிர் ஆற்றல் - நான்

சுழற்சிக்கு முதல் ஆதாரம் - நான்

விண்ணொளி விழையும் மண்ணிருள் விலக

முயற்சியின் விளைவு முட்டி விளையும்

ஒளியின் பிறப்பு - நான்

இருளின் முடிவு- நான்

 

தழல் நான்! ஆக்கல் அழித்தல் என் தொழிலே!

*********

உயிர் பிறந்தேன் மின்னல் வரியால் - நான்

உயிர்வளி தாலாட்டும் மின்னும் ஒளியாய் - நான்

திரித்தூண்ட பனி இரவைத் தொலைத்தேன் - நான் (2)

திங்கள்வர தழல் அழலாய்  கருகினேன் - நான்(2)

தழல் அழலாய் கனலாகி தணலானேன்

தணலைத் தணிக்கும் கார்முகிலாய் வருவாயா! (2)

 

தழல் நான்! ஆக்கல் அழித்தல் என் தொழிலே!

 

********

 

சிவந்த பொன்னே தழல் பெறவே

சிறுகுடில் மிளிரும் தழல் ஒளி பெறுமே (2)

மாலை அணியத் தீண்டும் தென்றலே (2)

மாயமாய் உன்னை அனைத்திடுமோ! 

போர் தொலைத்த காதல் மொழி - நான்

 

தழல் நான்! ஆக்கல் அழித்தல் என் தொழிலே!

 

********

தழல் மழைத்தூற சங்காய்ச் சுழல

இரவிலும் மழை வானவில்லாய் - நான்

சுடசுட  சுட்ட பணியாரம் முறுக்கு (2)

நொறுங்கியது பல்லானால் பொறுப்பல்ல - நான்

தீயன அழியும் தீபவொளி பரவும்

 

தழல் நான்! ஆக்கல் அழித்தல் என் தொழிலே!

 

********

வீழ்த்தும் சோர்வை அகற்றும் - தழல் நான்

மனதின் அகத்தீயை  அகற்றும் - தழல் நான்

மனதில் குறிக்கோளை ஏற்றும் - தழல் நான்

தடைகளை தகர்த்து சாதனைப் படைத்திடு!

 தழல்

தழல் நான்! ஆக்கல் அழித்தல் என் தொழிலே!

*******

மழலை பெண் வன்கொடுமை எரிக்கும் - தழல் நாம்

மழலை பெண் பாதுகாப்பு ஏற்றும் - தழல் நாம்

பசி பிணி பாகுபாடு போக்கும் - தழல் நாம்

பசுமை போர்த்த உழவு போற்றும் - தழல் நாம்

எந்தன் அறம் மறம் உலகமறியும் - தமிழன் நான்

எந்தன் நாகரிகம் பண்பாடு போற்றும் - தமிழன் நான்

தமிழன் நாம் தழல் நாம்!

 நல்வினை ஆக்கல் தீவினை அழித்தல் நம் தொழிலே! (2)

 

தமிழன் நாம் ! தழல் நாம்!